Checkmate Times, Pune City, Pune District, Pune Politics, Pune Crime, Pune Educational, Chekmet Times, checkmate news, chekmet news, election campaign, election news, political news, business news, Marathi news today, khadakwasla vidhan sabha, kothrud vidhan sabha, hadapsar vidhan sabha, parvati vidhan sabha, vadgaon sheri vidhan sabha, shivaji nagar vidhan sabha, kasba vidhan sabha, pune vidhan sabha
पुणे, दि. १३
ऑगस्ट २०२५ (Checkmate Times): पावसाळ्यामध्ये अत्यंत अत्यावश्यक बाबी वगळता सर्व
प्रकारच्या कामांसाठी रस्त्यांची खोदाई करायला बंदी असते. त्यातच सिमेंट कॉंक्रीटचा
पक्का रस्ता असल्यावर तर त्यावर आणखीन निर्बंध असतात. मात्र असे असताना देखील
शिवणे मधील लोखंडी सळया असलेला दर्जेदार असा एक सिमेंट कॉंक्रिटचा रस्ता खोदण्यात
आलेला आहे. त्याचबरोबर याबाबत पुणे महानगरपालिकेच्या पथविभाग आणि ड्रेनेज विभागाकडून
कोणतीही पूर्वपरवानगी घेण्यात आली नसल्याचे देखील समोर आले आहे. याहून धक्कादायक
म्हणजे एका तक्रारदाराने तक्रार करेपर्यंत पुणे महानगरपालिकेच्या झाडण काम
करणाऱ्या आरोग्य विभागासह पथविभाग आणि ड्रेनेज विभागाला याबाबत काहीही माहिती
नसल्याचे देखील समोर आले आहे. तर तक्रारदाराने वारजे कर्वेनगर क्षेत्रीय
कार्यालयातील या सर्व विभागांची हि मिलीभगत असल्याचा आरोप केलाय. तर पावसाळ्यात
खोदलेल्या या ड्रेनेजच्या खड्ड्यामुळे भविष्यात पूर्ण रस्त्याची चाळण झाल्यास
त्याला जबाबदार कोण असा प्रश्न या निमित्ताने उपस्थित होतो आहे.
याबाबत आम्ही
वारजे कर्वेनगर क्षेत्रीय कार्यालयाच्या शिवणे विभागाच्या आरोग्य निरीक्षक कौसर पटेल
यांना विचारणा केली असता, त्यांनी सांगितले की, तक्रारदाराची तक्रार प्राप्त
झाल्यानंतर आरोग्य विभागाच्या एका कर्मचाऱ्याने जाऊन तत्काळ पाहणी केली.
त्याचबरोबर सदरील कामाची परवानगी नसल्याचे आढळून आल्यानंतर त्यांना काम थांबवण्यास
सांगीतले. सदरील काम ड्रेनेज आणि पथ विभागाच्या अंतर्गत येत असल्याने त्या
विभागाच्या कनिष्ठ अभियंता तसेच मुकादमांना देखील लागलीच कळवले असून, पुढील कार्यवाही
त्यांचा विभाग निश्चित करेल असे कौसर पटेल यांनी चेकमेट टाईम्सशी बोलताना
सांगितले.
तर मुकादम राकेश भालेराव यांना विचारणा केली असता, असे काही झाले असल्याचे
आपल्याला माहित नाही. मी कार्यालयीन कामकाजासाठी परिमंडळात गेलो होतो. तर माझ्या
माध्यमातून शिवणे भागात कोठेही ड्रेनेज लाईन जोडण्यासाठी अथवा रस्ता खोदाईसाठी कोणालाही
लेखी अगर तोंडी परवानगी दिली नसल्याचे राकेश भालेराव यांनी सांगितले.
तर कनिष्ठ अभियंता सुमित चौगुले यांना याबाबत विचारणा केली असता, त्यांनी
आपल्याला याबाबत माहिती मिळताच तत्काळ संबंधित व्यक्तींना फोन करून काम थांबवण्यास
सांगितले असल्याचे सांगितले. तर मुकादम राकेश भालेराव यांना परिमंडळाचे काम
झाल्यानंतर पाहणी करण्यास सांगितले आहे. आपल्या माध्यमातून शिवणे भागात कोठेही
ड्रेनेज लाईन जोडण्यासाठी अथवा रस्ता खोदाईसाठी कोणालाही लेखी अगर तोंडी परवानगी
दिली नसल्याचे देखील चौगुले यांनी नमूद करत, संबंधितांवर नियमानुसार कारवाई करणार
असल्याचे चेकमेट टाईम्सशी बोलताना सांगितले.
एकूणच शिवणे मधील मोरे एचपी पेट्रोल पंपाच्या मागे असलेल्या सरडे बागेतील सार्थक
अपार्टमेंटच्या समोर ड्रेनेज लाईनसाठी सिमेंट कॉंक्रीटचा रस्ता फोडण्यास वारजे
कर्वेनगर क्षेत्रीय कार्यालयाच्या पथ आणि ड्रेनेज विभागाकडून कोणतीही पूर्वपरवानगी
दिली नसल्याचे समोर आले आहे. तर या भागातील तक्रारदाराच्या मते या परिसराशी
संबंधित असलेल्या एका कर्मचाऱ्याला विचारूनच हे “विकास” काम केले जात होते. त्याचा
या परिसराशी आणि या परिसराच्या विकास कामांशी जुना आणि घनिष्ठ संबंध असल्याने हे
सुरु असल्याचा आरोप तक्रारदाराने केला आहे. तर शिवणे उत्तमनगर भागात गेल्या काही
वर्षांमध्ये किंबहुना पालिका समावेश झाल्यापासून पथ आणि ड्रेनेज विभागाची अनेक
कामे सदोष पद्धतीने झालेली असून, त्यांचे सर्वेक्षण केले गेल्यास अनेक धक्कादायक
बाबी समोर येतील असेही तक्रारदाराने सांगितले आहे. त्यामुळे या भागातील नागरिकांना
भरलेल्या करातून होणाऱ्या विकास कामांपेक्षा त्रासच अधिक सहन करावा लागत असल्याचे
सांगितले. तर आपली ग्रामपंचायतच बरी होती अशीही भूमिका या भागातील तक्रारदाराने
चेकमेट टाईम्सशी बोलताना व्यक्त केली.
वरील वृत्त खाली लिंक जोडलेल्या
आमच्या सर्व सोशल मिडिया साईटवर उपलब्ध आहे. माहिती महत्वाची वाटत असेल तर शेअर
जरूर करा. याबाबत आपली काही प्रतिक्रिया असेल तर खाली कॉमेंट करू शकता. आपल्या
भागातील समस्या आणि उपक्रमांची माहिती आमच्या 9730307227 या क्रमांकावर फक्त व्हाटस अप करा !
तुमच्या फेसबुक / ट्विटर वर टाकून आम्हाला tag करा. खालील
लिंकवर क्लिक करून आम्हाला सोशल मिडीयाच्या सर्व प्लॅटफॉर्म’वर फॉलो करा
https://linktr.ee/checkmatetimes?utm_source=linktree_profile_share
