Checkmate Times, Pune City, Pune District, Pune Politics, Pune Crime, Pune Educational, Chekmet Times, checkmate news, chekmet news, election campaign, election news, political news, business news, Marathi news today, khadakwasla vidhan sabha, kothrud vidhan sabha, hadapsar vidhan sabha, parvati vidhan sabha, vadgaon sheri vidhan sabha, shivaji nagar vidhan sabha, kasba vidhan sabha, pune vidhan sabha
पुणे, दि. २७
जुलै २०२५ (Checkmate Times): वारजे पोलीस स्टेशनच्या हद्दीतील कर्वेनगर मधून रत्नागिरी
येथील देवाच्या दर्शनासाठी जात असताना मोठ्या भावाने आपल्या सख्या लहान भावाचा खून
केल्याची धक्कादायक घटना समोर आली आहे. ताम्हिणी घाटातील मौजे गोणवडी ता. मुळशी
जि. पुणे येथे रोडच्या कडेला खून करून हा मोठा भाऊ पसार होण्याच्या तयारीत होता.
मात्र वारजे पोलिसांच्या खबऱ्याने दिलेल्या माहितीवरून, पोलीस पथकाला खुनी भावाला
खुनाची घटना घडून २४ तास होण्याच्या अगोदरच पकडण्यात यश आले आहे.
याबाबत वारजे
पोलिसांनी दिलेल्या माहितीनुसार, शुक्रवार दि. २६ जुलै २०२५ रोजी दुपारी ४ वाजण्याच्या
सुमारास वारजे माळवाडी पोलीस स्टेशनच्या हद्दीतील कर्वेनगर पोलीस चौकी येथे नियमित
कामकाज सुरु होते. यावेळी पोलीस उपनिरीक्षक सचिन तरडे हे कर्तव्यावर असताना,
त्यांना त्यांच्या गोपनीय बातमीदारामार्फत खात्रीशीर माहिती मिळाली की, “कर्वेनगर
मधील एकाने त्याच्या सख्या भावाला ताम्हीणी घाटात मारुन टाकून दिले आहे”. बातमी
मोठ्या गुन्ह्याची होती आणि संशयित फरार होऊ नये म्हणून त्यावर तत्काळ कारवाई करणे
गरजेचे असल्याने, याबाबत तरडे यांनी तत्काळ परिमंडळ ३ चे पोलीस उपआयुक्त संभाजी
कदम, कोथरूड विभागाचे सहायक पोलीस आयुक्त भाऊसाहेब पटारे
यांच्या मार्गदर्शनाखाली, वरिष्ठ पोलीस निरीक्षक प्रकाश धेंडे, पोलीस निरीक्षक (गुन्हे) निलेश बडाख यांचे देखरेखीत, पोलीस उपनिरीक्षक
सचिन तरडे, तपास पथकाचे पोलीस उपनिरीक्षक संजय नरळे, पोलीस हवालदार विद्याधर गांगुर्डे, पोलीस शिपाई
गोविंद कपाटे, किशोर नेवसे आणि अनिरुद्ध ओव्हाळ यांच्या
पथकाने, त्याचा शोध सुरु केला.
दरम्यान, पथकाला
सदरचा इसम कर्वेनगरमधील कर्वेनगर मधील वनदेवी मंदिराच्या मागील टेकडीच्या परिसरात
असल्याची खात्रीशीर माहिती मिळाली. यावेळी पोलीस पथकाने तत्काळ सदर ठिकाणी धाव घेत,
सदर इसमास ताब्यात घेवून, कर्वेनगर पोलीस चौकी येथे आणले. त्यानंतर खबऱ्याने
दिलेल्या माहितीच्या अनुषंगाने त्याचेकडे चौकशी केली असता, त्याने त्याचे नाव
अनिकेत अनिल शिर्के (वय २६ वर्षे, रा. मावळे आळी, कर्वेनगर,
पुणे) असे असल्याचे सांगितले. त्याचबरोबर तो व त्याचा सख्या लहान
भाऊ ऋषीकेश अनिल शिर्के (वय २३ वर्षे) असे दोघेजण गुरुवार दि.२५ जुलै २०२५ रोजी
रात्री ९ वाजण्याच्या सुमारास कर्वेनगर मधून त्यांचे मुळगाव असलेल्या मौजे
गोळवशी-शिर्केवाडी, ता. लांजा, जि. रत्नागिरी येथील देवाच्या दर्शनासाठी त्यांचे
दुचाकीवरुन निघाले होते. दरम्यान रात्री सव्वा बाराच्या सुमारास ते दोघे ताम्हीणी
घाटातील मौजे गोणवडी, ता. मुळशी, जि. पुणे येथे रोडच्या कडेला थांबले. त्या ठिकाणी
ते दोघे आपासात बोलत बसले होते.
यावेळी ऋषीकेश
शिर्के यास दारु व गांज्याचे असलेले व्यसन सोडण्यावरुन दोघांमध्ये वाद झाला. त्या
वादातून पहाटे ३ वाजण्याच्या सुमारास अनिकेत याने ऋषीकेश याचेवर लोखंडी हत्याराने
वार केले. त्यामध्ये त्याचा मृत्यू झाल्याने तो तेथून पळून आला असल्याचे अनिकेत
शिर्के याने वारजे पोलिसांनी केलेल्या प्राथमिक चौकशी दरम्यान सांगितले. सदर
घटनेचे गांभीर्य ओळखून आणि घटना पौड पोलीस स्टेशनच्या हद्दीत घडल्याचे समोर येत
असल्याने, वारजे माळवाडी पोलीस स्टेशनचे वरिष्ठ पोलीस निरीक्षक प्रकाश धेंडे यांनी
पौड पोलिसांशी संपर्क साधत घडलेली घटना आणि संशयिताने सांगितलेली माहिती दिली.
यावेळी पौड पोलीस स्टेशनचे अधिकारी संतोष गिरीगोसावी यांनी त्यांच्या पोलीस स्टेशनच्या
हद्दीतील, ताम्हीणी घाटातील गोणवडी गावच्या हद्दीत एक अनोळखी पुरुषाची मयत बॉडी सकाळी
मिळून आली असून, त्याची ओळख पटवण्याची तसेच पुढील कायदेशीर कारवाई चालू असल्याचे
सांगीतले.
यावेळी
बेवारस बॉडीचा व त्याचे नातेवाईकांचा शोध होणे करीता पौड पोलीस स्टेशन कडील तपास
यादी शोध पथकाने प्राप्त केली. त्यातील मयताचा फोटो वारजे पोलीसांच्या ताब्यात
असलेल्या अनिकेत शिर्के यास दाखवला असता, त्याने सदरची मयत बॉडी ही त्याचा सख्खा
भाऊ ऋषीकेश शिर्के याची असल्याची सांगुन, त्यानेच त्याचा खुन केला असल्याचे
सांगीतले. त्यानंतर पौड पोलीसांशी समन्वय साधून सदरच्या खुनाच्या गुन्ह्यातील
आरोपी नामे अनिकेत अनिल शिर्के यास पुढील कायदेशीर कार्यवाही करीता पौड
पोलीसांच्या ताब्यात दिले आहे. पुढील तपास पौड पोलीस करीत आहेत. एकूणच वारजे
पोलिसांच्या खबऱ्याने दिलेली माहिती, त्यावर तत्काळ केलेल्या कारवाईमुळे वारजे
पोलिसांवर कौतुकाचा वर्षाव होत आहे. तर इतर गुन्ह्यांमध्ये देखील अशीच दमदार
कारवाई करावी अशी अपेक्षा देखील नागरिकांकडून व्यक्त केली जात आहे.
वरील वृत्त खाली लिंक जोडलेल्या
आमच्या सर्व सोशल मिडिया साईटवर उपलब्ध आहे. माहिती महत्वाची वाटत असेल तर शेअर
जरूर करा. याबाबत आपली काही प्रतिक्रिया असेल तर खाली कॉमेंट करू शकता. आपल्या
भागातील समस्या आणि उपक्रमांची माहिती आमच्या 9730307227 या क्रमांकावर फक्त व्हाटस अप करा ! तुमच्या फेसबुक / ट्विटर वर टाकून आम्हाला tag करा.
खालील लिंकवर क्लिक करून आम्हाला सोशल मिडीयाच्या सर्व प्लॅटफॉर्म’वर फॉलो करा
https://linktr.ee/checkmatetimes?utm_source=linktree_profile_share
