Checkmate Times, Pune City, Pune District, Pune Politics, Pune Crime, Pune Educational, Chekmet Times, checkmate news, chekmet news, election campaign, election news, political news, business news, Marathi news today, khadakwasla vidhan sabha, kothrud vidhan sabha, hadapsar vidhan sabha, parvati vidhan sabha, vadgaon sheri vidhan sabha, shivaji nagar vidhan sabha, kasba vidhan sabha, pune vidhan sabha
पुणे, दि. २१
जुलै २०२५ (Checkmate Times): पुणे महानगरपालिका हद्दीमधील खडकवासला येथे लंपीची
लागण झालेल्या शर्यतीच्या बैलाचा दुर्दैवी मृत्यू झालाय. तब्बल २ लाख रुपये किमतीचा
हा बैल तानाजी रघुनाथ मते याच्या मालकीचा होता. त्याने अनेक राज्यस्तरीय शर्यती
जिंकून खडकवासल्याने नाव राज्यभरात चमकवले होते. तर रघुनाथ मते यांच्या आणखीन एका
सहा महिन्यांच्या कालवडीला देखील लंपीची लागण झालेली असून, त्याच्यावर पशुधन विकास
विभाग खानापूर यांच्यामार्फत उपचार सुरु असल्याचे पशुधन विकास अधिकारी डॉ. विकास
महाजन यांनी चेकमेट टाईम्सशी बोलताना सांगितले. या विभागात एकूण २ गोवंश लंपी
ग्रस्त असल्याचे देखील त्यांनी सांगितलेले आहे. लंपीची लागण झालेली असल्याने बैलाचे
शवविच्छेदन करता येत नसल्याने, त्याचे नमुने औंध येथील रुग्णालयात तपासणीसाठी
पाठवले असल्याचे देखील महाजन यांनी सांगितले आहे.
वारजे
माळवाडी मध्ये गोवंशाला लंपी सदृश रोगाची लागण झाली असल्याचे समोर आल्यानंतर आणखीन
काही भागांमधून गोवंशाला लंपी सदृश रोगाची लागण झाली असल्याचे समोर येऊ लागले आहे.
शनिवार दि. ५ जुलै २०२५ रोजी पहिल्यांदा हि बाब लक्षात आल्यानंतर नागरिकांमध्ये भय
पसरायला नको म्हणून वृत्त प्रसिद्ध न करता, प्रशासनाला याबाबत कळवून देखील काहीही
हालचाली होत नसल्याने चेकमेट टाईम्सने बुधवार दि. १६ जुलै २०२५ ला सर्वात पहिले
वृत्त प्रसिद्ध केले होते. यानंतर खडकवासला आणि कात्रज भागातील गोवंश देखील लंपी
सदृश रोगाच्या विळख्यात असल्याचे समोर आले होते.
तर आतापर्यंत
हवेली पंचायत समिती विभागात ५५ गोवंश लंपी बाधित असून, त्यातील १४ वर सध्या उपचार
सुरु असल्याचे पशुधन विस्तार अधिकारी डॉ. प्रकाश काळे यांनी चेकमेट टाईम्सशी
बोलताना सांगितले. त्याचबरोबर या दगावलेल्या बैलावर खाजगी डॉक्टर कडून उपचार सुरु
होते. त्याबाबत वेळीच शासकीय डॉक्टरांचा सल्ला घेत, उपचार सुरु केले असते, तर तो
बैल जगवता आला असता, असा विश्वास डॉ. काळे यांनी व्यक्त केलाय. त्याचबरोबर आपल्या
पशुधनाला लंपीची लागण झाली असल्यास त्वरित शासकीय वैद्यकीय अधिकाऱ्यांना संपर्क
करून, उपचार घ्यावेत असे आवाहन देखील त्यांनी केले आहे.
खडकवासला
भागातील हा बैल दगावल्यामुळे शहराच्या उपनगरांमध्ये लंपीने आपला विळखा घट्ट करायला
सुरुवात केली आहे की काय असे भितीदायक चित्र समोर आले आहे. या पार्श्वभूमीवर
प्रशासनाने वेळीच पावले उचलण्याची गरज असून, हा रोग जर वाढत गेला तर शहरात
एका मोठ्या साथीच्या रोगाचे आगमन होऊन प्राणीजीवनचा नव्हे तर जनजीवन विस्कळीत होऊ
शकते आणि त्याला जबाबदार कोण असणार असा प्रश्न या निमित्ताने उपस्थित होतो आहे. तर
याबाबत आम्ही सिंहगड रस्ता क्षेत्रीय कार्यालयाच्या महापालिका सहायक आयुक्त
प्रज्ञा पोतदार पवार यांना विचारणा केली असता, त्यांना याबाबत माहिती नसल्याचे
समोर आले आहे. तर प्राण्यांचा विभाग पशुवैद्यकीय अधिकाऱ्यांच्या अखत्यारीत
असल्याने त्यांना याबाबत माहिती असू शकते असे त्यांनी चेकमेट टाईम्सशी बोलताना
सांगितले. तर आपण याबाबत माहिती घेऊन, शक्य तेवढी अधिक वैद्यकीय मदत पोचवण्यासाठी
प्रयत्न करू असेही सांगितले आहे. त्यामुळे शहर आणि उपनगरांच्या हद्दीत आपल्या
पशुधनाला लंपीची लागण झाली असल्यास तत्काळ शासकीय पशु वैद्यकीय अधिकाऱ्यांना
संपर्क करणे आणि उपचार मिळवणे आत्यंतिक गरजेचे असल्याचे यातून समोर येते आहे.
गुगल वरून
मिळालेल्या माहितीनुसार
लंपी (Lumpy Skin Disease) हा एक विषाणूजन्य रोग आहे, जो गुरे आणि म्हशींमध्ये
होतो. यात जनावरांच्या त्वचेवर गाठी येतात, ताप येतो आणि ते
लंगडतात. हा रोग प्रामुख्याने डास, माश्या आणि गोचिड
यांच्याद्वारे पसरतो.
लंपी स्कीन
आजाराची माहिती आणि कारण: हा रोग Lumpy Skin Disease Virus (LSDV) (LSDV) नावाच्या विषाणूमुळे होतो, जो पॉक्सव्हायरस
कुटुंबातील आहे.
पसरण्याची
पद्धत:
रोगग्रस्त जनावरांच्या संपर्कात आल्यास, तसेच डास, माश्या आणि गोचिड यांच्या चावण्यामुळे याचा प्रसार होतो. (ज्या भागात हि
जनावरे आढळली आहेत, त्या भागात पुणे महानगरपालिकेची स्वच्छता
यंत्रणा काम करत नाही. सर्वत्र चिखलाचे साम्राज्य आहे. बीडीपी आरक्षण बाधित
क्षेत्र असल्याने पुणे महानगरपालिकेचा कर भरून देखील रस्ते, पाणी,
ड्रेनेज अशा कोणत्याच सुविधा नाहीत. माणुसकीतून कचरा उचलण्यापलीकडे
कचरा उचलण्याची देखील ठोस यंत्रणा नाही.)
लक्षणे: जनावरांना ३
ते ५ दिवस ताप येतो. त्वचेवर गाठी येतात, ज्या दोन ते पाच सेंटीमीटर
पर्यंत वाढू शकतात. गाठींमुळे जनावरे लंगडतात. डोळे आणि नाकातून स्त्राव येतो.
तोंडाला फोड येतात.
उपाय: लसीकरण हा
यावरचा प्रभावी उपाय आहे,
असे पशुवैद्यकीय तज्ञ सांगतात. लक्षणे दिसल्यास त्वरित पशुवैद्यकाशी
संपर्क साधावा. जनावरांना स्वच्छ ठिकाणी ठेवावे. डास, माश्या
आणि गोचिड यांच्यापासून बचाव करण्यासाठी उपाययोजना कराव्यात.
नुकसान: या
आजारामुळे जनावरांच्या त्वचेचे नुकसान होते, ज्यामुळे त्यांच्या चामड्याचे
मूल्य घटते, असे विकिपीडियावर नमूद आहे. दुग्धोत्पादन घटते.
मृत्यूदर वाढू शकतो.
लंपी स्कीन
माणसांना होतो का?: नाही,
लम्पी स्कीन हा एक पशुजन्य रोग आहे, जो
माणसांना होत नाही.
दूध पिणे
सुरक्षित:
लम्पी स्कीन झालेल्या जनावरांचे दूध पिणे सुरक्षित आहे कारण हा नॉन-झुनोटिक आजार
आहे, असे पशुवैद्यकीय तज्ञांचे मत आहे, असे काही
वेबसाईटवर नमूद आहे.
वरील वृत्त खाली लिंक जोडलेल्या
आमच्या सर्व सोशल मिडिया साईटवर उपलब्ध आहे. माहिती महत्वाची वाटत असेल तर शेअर
जरूर करा. याबाबत आपली काही प्रतिक्रिया असेल तर खाली कॉमेंट करू शकता. आपल्या
भागातील समस्या आणि उपक्रमांची माहिती आमच्या 9730307227 या क्रमांकावर फक्त व्हाटस अप करा ! तुमच्या फेसबुक / ट्विटर वर टाकून आम्हाला tag करा. खालील
लिंकवर क्लिक करून आम्हाला सोशल मिडीयाच्या सर्व प्लॅटफॉर्म’वर फॉलो करा
https://linktr.ee/checkmatetimes?utm_source=linktree_profile_share
